ကာယဗလလေ့ကျင့်သူတစ်ယောက်အတွက်ကြွက်သားတစ်ခုတည်းကိုသီးသန့်ရွေးချယ်လေ့ကျင့်မယ်ဆိုရင်တော့ဘက်စုံကောင်းမွန်တဲ့သူတစ်ယောက်ဖြစ်လာမှာမဟုတ်ပါဘူး။

Bodybuildingဆိုသည့်အတိုင်းခန္ဓာကိုယ်ကိုအနုစိတ်ပုံဖော်နိုင်မှကြည့်ကောင်းသည့်ဘော်ဒီတစ်ခုကိုပိုင်ဆိုင်နိုင်မှာပါ။

လက်မောင်းအားသန်၍လက်မောင်းချည်းပဲဖိကစားနေရင်တော့သင့်အတွက်လိုက်လေဝေးလေနဲ့လိုအပ်ချက်တွေကပြည့်မယ်မထင်ပေ။ထိုအတူပင်ကျွန်တော်တို့သည်လက်မောင်းရှေ့သားနှင့်နောက်သားလေ့ကျင့်မှုတွင်အများစုသည်လက်မောင်းရှေ့သားကိုသာအာရုံစိုက်ကစားတတ်ကြသည်။လက်မောင်းရှေ့သားမို့မောက်လုံးဝန်းနေပြီးလက်မောင်းနောက်သားအားနည်းနေရင်သင့်အတွက်SideTricepsမှာအခက်တွေ့နိုင်ပါပြီ။

နောက်သားဆိုတာလက်မောင်းအပေါ်ပိုင်းထုရဲ့၃ပုံ၂ပုံကိုနေရာယူထားပါတယ်Tricepsဆိုတဲအတိုင်းလက်မောင်းနောက်သားမှာကြွက်သား၃မျိုး inner -medial- outerဆိုပြီးပါဝင်ပါတယ်။တစ်ချို့ကလည်းပြောကြတယ်လက်မောင်းနောက်သားသည်အခြားလေ့ကျင့်ခန်းများတွင်အကူသဘောမျိုးပါဝင်နေသဖြင့်သိပ်မကစားသင့်ဟုဆိုကြသည်။မှန်သင့်သလောက်မှန်သော်လည်းလက်မောင်းနောက်သားကိုရှေ့သားထက်ပိုမကစားရင်တောင်တန်းတူတော့ကစားသင့်သည်။

မောင်အိုလံပီယာတွေရဲ့လက်မောင်းနောက်သားလေ့ကျင့်မှုတွေကိုတင်ပြရင်တစ်ယောက်နဲ့တစ်ယောက်မတူညီတဲ့အယူအဆတွေလေ့ကျင့်ခန်းတွဖက်ပုံတွေကြောင့်ကျွန်တော်တို့အတွက်ဘာကိုအကောင်းဆုံးဆိုတာဒွိဟဖြစ်သွားနိုင်သည်။ယခုဆောင်းပါးမှာတော့၄ထပ်ကွမ်းချန်ပီယံဂျေကတ်တလာရဲ့လက်မောင်းနောက်သားအကြံပေးချက်တစ်ချို့ကိုတင်ပြပေးလိုက်ပါတယ်။

၁။ကျွန်တော့်အတွက်တော့လက်မောင်းနောက်သားကဗီဇပါရမီမပါလာခဲ့ပါဘူး။ကျွန်တော့်ကိုယ်ခန္ဓာတည်ဆောက်ပုံပေါ်မူတည်ပြီးလေ့လာလေ့ကျင့်ခဲ့ရပါတယ်။အကောင်းဆုံးကိုပြောရရင်လေ့ကျင့်ချိန်တိုင်းမှာစိတ်နဲ့ကြွက်သားကိုဆက်နွယ်ပြီးပုံဖော်ပါ။စိတ်စွမ်းအားပြည့်ဝပြီးမှန်ကန်သောနည်းစနစ်ပေါင်းစပ်ထားရင်သင်လိုချင်တဲ့ကြွက်သားကိုပိုင်ဆိုင်နိုင်မှာပါ။

၂။ကျွန်တော်လက်မောင်းနောက်သားလေ့ကျင့်ချိန်မှာမပါမဖြစ်ကတော့ကေဘယ်လ်ကြိုးနဲ့လေ့ကျင့်ခြင်းပါအဆိုပါကေဘယ်လ်ကြိုးနဲ့လက်မောင်းနောက်သားလေ့ကျင့်ခြင်းကလက်မောင်းနောက်သားအရွယ်အစားနှင့်ပုံသဏန်အတွက်အလွန်ထိရောက်တဲ့လေ့ကျင့်ခန်းဖြစ်ပါတယ်ခန္ဓာကိုယ်ပုံစံတကျနှင့်သင့်ရဲ့စိတ်ကိုကြွက်သားဆီခေါ်ဆောင်နိုင်တဲ့လေ့ကျင့်ခန်းတစ်ခုပါ။ဥပမာ–cable press down

၃။parallel bar dip လေ့ကျင့်ခန်းကိုကျွန်တော့်လက်မောင်းနောက်သားထုတင်သောအဓိကလေ့ကျင့်ခန်းအဖြစ်လေ့ကျင့်ပါတယ်။တစ်ချို့ကရင်အုပ်ကြွက်သားကွဲပြားပေါ်လွင်ဖို့လေ့ကျင့်ပါတယ်(လေ့ကျင့်မှုတွင်ကိုယ်အနေအထားကွာပါတယ်)ကျွန်တော်ကတော့parallelbarကိုလက်မောင်းနောက်အတွက်ပိုကြိုက်ပါတယ်။ဒါကတော့တစ်ယောက်နှင့်တစ်ယောက်အမြင်ချင်းမတူညီကြပါဘူး။parallel bar လေ့ကျင့်ခန်းကတော့ကျွန်တော့်လက်မောင်းနောက်သားအတွက်အကျိုးပြုလေ့ကျင့်ခန်းတစ်ခုပါ။ကိုယ်အလေးချိန်ပေါ့နေသေးလျင်ခါးမှာအလေးချိတ်ပြီးကစားနိုင်ပါတယ်။

၄။လက်တစ်ဖက်ချင်းဒမ်ဘယ်လ်နောက်သားဆန့်ကိုကျွန်တော့်လက်မောင်းရဲ့အလယ်ကြွက်သားရှည်ကိုထိရောက်ဖို့ကစားပါတယ်။ထုတက်စေခြင်းထက်ကွဲပြားပေါ်လွင်မှုအတွက်လေ့ကျင့်ရတဲ့နောက်သားလေ့ကျင့်ခန်းမှာတစ်ခုအပါအဝင်ပါ။လက်မောင်းနောက်သားထဲသွေးလည်ပတ်မှုကောင်းစေတဲ့လေ့ကျင့်ခန်းတစ်ခုလည်းဖြစ်ပါတယ်။လက်နှစ်ဖက်စုံကိုင်ပြီးနောက်သားဆန့်ခြင်းလည်းရှိသလိုကေဘယ်လ်ကြိုးနဲ့လည်းခေါင်းပေါ်နောက်သားဆန့်ကိုလေ့ကျင့်နိုင်ပါတယ်။အဓိကသတိထားရမှာကတံတောင်တွေကားမသွားဖို့နှင့်နောက်သားကြွက်သားအပေါ်မှာစိတ်အာရုံစည်းပြီးညှစ်ကစားနိုင်ဖို့ကသော့ချက်တစ်ခုပါ။

၅။လက်မောင်းနောက်သားကိုမည့်သည့်ကြွက်သားနှင့်တွဲဖက်ကစားရမလဲဆိုတာတော့ပုံသေကားချပ်ပြောမရပါဘူး။မိမိရဲ့လေ့ကျင့်မှုအစီအစဉ်ပေါ်မှာမူတည်နေပါတယ်။တစ်ချို့ကအတွန်းလေ့ကျင့်ခန်းတွေမှာလက်မောင်းနောက်သားတွဲကစားတယ်။တစ်ချို့ကအောက်ပိုင်းရက်မှာတွဲကစားတယ်တစ်ချို့တစ်ရက်တည်းသီးသန့်ပေးပြီးလက်မောင်းရှေ့နောက်တွဲကစားတယ်ြကြွက်သားအကြီးတွေကိုလေ့ကျင့်ပြီးမှလက်မောင်းနောက်သားကိုလေ့ကျင့်ခြင်းကတော့အကောင်းဆုံးပါ။

၆။လက်မောင်းနောက်ရဲ့အတွင်းကြွက်သားထုတက်ဖို့နောက်ထပ်လေ့ကျင့်ခန်းတစ်ခုကEZbarဖြင့်လေ့ကျင့်ခြင်းပါ။အပေါ်ဆုံးအရောက်တွင်တံတောင်ကိုဆန့်လိုက်ခြင်းကလက်မောင်းနောက်ကြွက်သားကိုတင်းအားလျော့ပြီးထိရောက်မှုနည်းကာအဆစ်ကိုဒဏ်ဖြစ်စေတယ်လို့ကျွန်တော်ထင်တယ်။EZbarဖြင့်ပက်လက်အိပ်နောက်သားဆန့်ကစားရင်တော့သင့်အနေနဲ့ကစားဖော်တစ်ယောက်ကိုအနားမှာထားခြင်းကအကောင်းဆုံးပါ။ဒီကစားနည်းကအခန့်မသင့်ရင်သင့်နဖူးကိုကွဲစေနိုင်ပြီးနည်းလမ်းတကျကစားတတ်ဖို့အရမ်းအရေးကြီးပါတယ်။

၇။လက်မောင်းနောက်သားကိုအကြိမ်အကျော့အများကြီးဖြင့်ဒဏ်မဖြစ်ပါစေနှင့်။လက်မောင်းနောက်သားတွေဟာအခြားလေ့ကျင့်ခန်းတွေမှာအကူသဘောနဲ့ပါဝင်ပတ်သက်ပြီးသားဖြစ်ပါတယ်။သေးငယ်တဲ့ကြွက်သားဆိုပြီးအမှုမဲ့အမှတ်မဲ့သဘောထားကာပေါ့ပေါ့တန်တန်ဖြင့်လေ့ကျင့်မှုတွင်ပစ်ပယ်ထားလို့မရသလိုမတရားလေ့ကျင့်ပြီးလည်းမခိုင်းစေသင့်ပေ။

နောက်သားလေ့ကျင့်သူအများစုရဲ့အဓိကမှားတတ်တာကအလေးတွေအများကြီးနဲ့အကြိမ်အကျော့အများကြီးကစားခြင်းကိုသတိထားဖို့ပါ။ကာယဗလမှာအလေးအများကြီးကစားဖို့ထက်မိမိကြွက်သားကိုထိရောက်တဲ့လှုံဆော်မှုနဲ့ပြည့်ဝတဲ့ညှစ်အားနည်းစနစ်တကျနဲ့လေ့ကျင့်နိူင်ခြင်းကိုကြိုးစားပါ။

နောက်ဆုံးအနေနဲ့ မောင်အိုလံပီယာပြိုင်ပွဲ၀င်ဟောင်း ကီဗင်လက်ဗရွန်း၏အကြံပေးချက်လေးကိုအပိုဆောင်းအနေနဲ့ရေးသားပေးလိုက်ပါတယ်။လက်မောင်းနောက်သားနှင့်ပတ်သက်လာလျှင်ကာယဗလတွင်ကီဗင်လက်ဗရွန်းလောက် ပိုမကောင်းနိုင်ကြပါ။ တကယ်တော့ လက်ဗရွန်းကို တခြားအစိတ်အပိုင်းများမှတဆင့် အနိုင်ယူသွားခဲ့သည်များရှိ၏။သို့သော်သူ့လက်မောင်းနောက်သားများသည်အထူးတလည်ပင်အထင်ကြီးစရာကောင်းနေသည်။ သူ့လက်မောင်းများ၏ လုံး၀န်းသော သဏ္ဌာန်ဖြစ်ပေါ်စေပြီး သူ့most muscular ပို့စ်သည်လည်းအထူးခြားဆုံးပြကွက်တစ်ခုဖြစ်သည်။

၁၉၉၂ခုနှစ်တွင် လက်ဗရွန်းသည် ပွဲနှစ်ပွဲတည်းဖြင့် အကြီးကျယ်ဆုံးကာယဗလမောင်စာရင်း၀င်သွားနိုင်ခဲ့သည်။ ဒုတိယနှစ်ခါရခဲ့သည်(သူ ပထမဆုံး စပြိုင်သည့် မောင်အိုလံပီယာတွင် ဒုတိယရခဲ့သည်)။ နောက်ပြီးမှသာတတိယတစ်ခါရသည်။

ကီဗင်လက်ဗရွန်းပြောသည်မှာ “လက်မောင်းနောက်သားက ကြွက်သားအားလုံးကို ထိဖို့ ကျွန်တော် ကစားနည်းမျိုးစုံ ကစားသည်။ ကျွန်တော်ကစားခဲ့တဲ့ အရာအားလုံးတိုင်း စာအုပ်တွေထဲ မပါနိုင်ပါ။ ကျွန်တော့် လေ့ကျင့်စဉ်အများစုသည် ခံစားမှုနှင့် ပင်ကိုသိစိတ်ပေါ်မှာ အခြေခံထားပါသည်။” ဟူ၍ ကျွန်တော်တို့ကို ထိထိရောက် အကြံပေးခဲ့သည်။

အောင်အောင်(လှိုင်)